本周六(6日)晚上香港馬會受注英國2400米一級賽葉森打吡大賽，有機會繼2009年崔家亮的「海都之星」後，再由香港馬主愛駒勝出。
暫時報名馬中，有匹「中國夢」馬主為Robert Ng，亦即係大家熟悉嘅大地產商信和老闆黃志祥。此駒至今六戰四勝，本來唔多覺有潛力跑葉森打吡，但最近三仗全勝，包括兩場愛爾蘭李奧柏馬場的葉森打吡熱身戰，均為2000米三級賽的百利斯錦標和打吡預賽錦標，反映正在大幅進步中，難怪黃志祥咁大手筆，喺後補階段交咗約90萬報名費，加入出戰葉森打吡，雖然現時係17倍冷門，但估計稍後賠率會下跌。
黃志祥近年在港養馬運欠佳，上年本來有匹質素極高嘅「信利多」，但在香港打吡不幸遇上近年最高質素嘅中長途馬「威爾頓」、「步步友」，只得第三，結果在港僅六戰不勝就退役，且看「中國夢」能否為黃志祥一洗頹風。
至於暫時葉森打吡大熱門，係戴圖理揀騎的「金號角」，這匹「十字灣角」一族三歲雄馬至今三戰三捷，今季更連續取下一場表列賽和一場二級賽，尤以上場約克2100米二級賽東帝錦標大勝廄侶「木球能手」兩個多馬位令人注目，無怪乎現時僅2.87倍。而「木球能手」上場東帝錦標正是由戴圖理策騎，雖然不敵「金號角」，但戴圖理指出此駒仍大有進步空間，絕對有力威脅「金號角」。