實德環球（487）副主席馬浩文（Hoffman）腳傷未癒又心思思比賽！Hoffman噚日出席股東會，行路一拐一拐，原來佢早排跟太太同十幾年前嘅波友打羽毛球，佢笑住話「個腦反應到，身體反應唔到」，腳踭後方條筋斷咗，要做手術治理，傷口有4、5吋長，佢平時最鍾意踩單車，暫時都要唞唞。
佢話，今個禮拜醫生先批准佢試踩單車機，仲未可以出街，怕要緊急煞停時對腳唔夠力。不過佢好想快啲康復，因為今年10月有大型比賽，單車隊會「重兵」出戰，佢好恨親自落場踩埋一份。
Hoffman透露，醋同糯米對筋骨唔好，一定要戒，中醫有勸佢戒埋牛，以免傷口埋得唔靚，但Hoffman好少理，「男人老狗，（傷口）仲要係隻腳」，當多條戰績型啲咁話喎！