在A股市場，獐子島旗下的扇貝可以話鼎鼎有名，生死難知，神秘莫測。公司前晚發公佈話，5月中啟動扇貝抽查，結果顯示不存在減值的風險，即係話扇貝冇事。同時宣佈停牌，稍後將進行配股集資。咦？公司去年唔係話，扇貝已經全部死晒，屍骸已被沖走嗎？唔通為配合抽水，啲扇貝又識得全部游返嚟？
去年10月，獐子島公佈季績前，突然話約70億枚扇貝苗因遇到冷水全部死晒，損失達8億元人民幣，但又冇出示扇貝殼，令唔少股民猜疑，到底呢批扇貝是否存在。獐子島股價當時插水近三成，其後管理層增持，又低價發認股權，而家股價較出事前仲高出三成。獐子島管理層話，今年5月檢查扇貝，與去年出事屬於不同海域。又話有投資者代表參與抽查，真係信不信由你。
黃尹華