港交所（388）因滬港通升到嘭嘭聲，為方便內地投資者，佢哋噚日都喺騰訊（700）旗下微信開咗公眾號「港股通」，方便投資者透過微信取得滬港通嘅實時交易資訊，不過呢個公眾號個ID係「gangjiaosuo」（港交所嘅國語拼音，紅框示），唔係大家熟悉嘅「hkex」，唔講仲以為山寨產品！
先講公眾號係乜東東，原理其實同facebook入面嘅專頁差不多，係一個提供畀機構、公眾人物等嘅官方平台，方便佢哋統一發佈資訊。有啲公眾號仲會每日朝早送出焦點新聞或文章畀微信用家，對於冇得上facebook嘅內地同胞嚟講，其實係一個好重要嘅資訊平台。
今次「港股通」提供嘅服務，包括有股價、成交額、額度餘額、指數追蹤等實時資訊。每個交易日完結後仲會列出滬港通成交最活躍嘅股票名單，亦可查閱香港上市公司公告，都幾方便嘅。