出外旅遊，好多人都鍾意順手拎啲酒店用品留念。費清留意到Hotels.com個調查，發現阿根廷遊客最愛喺酒店順手牽羊，73%人自認偷過嘢；哥倫比亞旅客就最克制，得31%試過喺酒店偷竊，香港人就威番次，同挪威、南韓及丹麥齊齊並列最老實酒店住客第2位。
#偷毛巾坐監三個月
Hotels.com喺今年3月至4月，用電郵訪問28個國家和地區近5,000位旅客，問佢哋有冇試過偷酒店財物。估唔到成20%旅客曾經拎走房裏面嘅文具，12%人偷過拖鞋，10%人衰到連匙卡都帶走埋。至於洗頭水、𤩹液等梳洗用品，網站發言人就話「係人都會拎走」，所以唔算偷。
唔好睇新加坡人咁守紀律，71%認有貪心拎走酒店物品。多數酒店對住客隻眼開隻眼閉，將賊仔住客列入黑名單，或罰款了事。
不過，日本幾年前就有人試過偷咗房間內嘅浴袍同煙灰缸，結果被捕；尼日利亞一位女士喺阿布加希爾頓酒店偷走咗兩條毛巾，坐足3個月監。
據各地酒店業內人士透露，在過去20年見過住客猖狂到偷走酒店大堂鋼琴，另外亦聽聞過電視機、窗簾布及鮮花等被盜；較騎呢嘅失竊品包括野豬頭掛飾、中世紀劍及酒店看門狗等。
費清問過香港香格里拉大酒店嘅住客偷竊紀錄，佢哋承認曾有房間水晶燈一件小配件不翼而飛，但唔肯透露處理盜竊事件嘅做法。
＃要生計，也要生活 ＃毋忘初衷
費清