喺1946年開檔嘅荔園，18年前關門大吉，唔少由細到大、玩咗幾代人嘅粉絲都好傷心。荔園呢個港人集體回憶，由邱德根嘅細仔邱達根做搞手，選擇今年66周年紀念、即係呢個月26號喺中環海濱重開，大家都好期待。
八方噚日收到荔園開幕禮邀請函，竟然係細個嗰陣最鍾意玩嘅康樂棋，加埋本小學生字簿，突然間，八方後生咗10幾年，變番細路仔。
荔園公關哥哥話，呢份開幕禮邀函，想喚起出席嘉賓簡單快樂嘅童年回憶，所以將上世紀兒時玩意，包括生字簿同康樂棋用作設計藍本。好似個棋盒設計，用咗懷舊風味嘅顏色、字體同紙張，封面仲畫咗一對經典肥仔肥女。
考慮多做一批發售
攤開張康樂棋棋盤紙，畫咗多個荔園熱門景點，第一站就係大家好熟悉荔園城堡，其他仲有吸蕉大笨象、滑稽恐龍屋、碰碰車、飛天椅、叮叮船、旋轉木馬，同埋荔園唔少得贏香口膠嘅經典掟階磚等。至於嗰本小學生字簿，「簿皮」以淡黃色調設計，加上荔園獨有嘅「老虎仔」做封面標記，但最令八方發出會心微笑，背面就係經典英文字母表。八方寫識呢26個大細楷字母、草書，都付出唔少汗水，久違咗小學生感覺，一下子返晒嚟。
荔園公關話，呢個開幕禮邀函原本淨係發畀出席嘉賓，點知反應出乎意料咁熱烈，荔園𠵱家都考慮屆時多做一批在園內發售，等大家買返屋企做紀念。
李八方
mailto:[email protected]