自由黨田北俊（圖）早前話委託港大民意研究計劃，進行訪問5,000人嘅超級民調，問市民話係咪支持政改方案，一使就25萬蚊。田少噚日話，黨內有聲音指，如果只係問市民支唔支持方案係唔足夠，應該問埋市民「立法會應否通過政改方案」，因為兩者結果唔一樣，所以請港大民意研究計劃多問一條問題，畀泛民議員參考一下。
民調機構按題目數量收費，田少要求問多一條問題，即時要多畀5萬蚊，但對於身家豐厚嘅田少嚟講，呢5萬蚊簡直係散紙，不值一提。自由黨呢個超級民調由今日開始做，預料做到本月14日，6月15日會有結果。不過無論民調結果點樣都好，田少話，政改方案通過嘅機會等於零。