嚟到夏天，唔少教頭都要為前途奮鬥。利物浦領隊羅渣士盛傳帥位不穩，好在喺周二「面聖」表現良好，先𠱁得掂主席華拿而保住份工；至於紅軍前主帥賓尼迪斯就風光得多，周三正式上任「銀河艦隊」皇家馬德里教練。
10年前，賓尼迪斯帶領利物浦贏得第五座歐聯冠軍，今年喺仕途上就更上一層樓，如願以償做到歐聯10冠球隊皇馬嘅教頭，簽約三季；佢喺周三下晝去到巴拿比奴球場，同會長佩雷斯一齊出席記者會。肥賓眼濕濕咁話：「馬德里係我屋企，我係一個勤力工作嘅人，我擁有一支出色嘅教練團隊輔助我，希望我哋可以實現大家期望嘅目標。」
迪基亞料成首簽
肥賓喺馬德里出世，掛靴後教過皇馬B隊，之後輾轉過咗成廿年先入主呢支「銀河艦隊」。西班牙傳媒話，佢會用加里夫巴利做核心，希望激活呢位價值一億歐元嘅威爾斯球星；之後轉會計劃啟動，首個目標就係曼聯門將迪基亞。有英媒仲指，迪基亞決定咗去皇馬，轉會費約2,500萬鎊（約三億港元），仲已經同曼聯嘅職球員道別㖭。另外，皇馬可能覺得迪基亞唔夠星味，為咗延續一年一星政策，諗住羅致曼城嘅英超神射手阿古路；而對家曼城亦吼實佢哋嘅中場艾斯高。
至於賓帥舊會利物浦上季爭少少就贏到英超冠軍，領隊羅渣士風頭一時無兩，但一個蘇亞雷斯離隊，就爭啲搞到佢連工都冇埋；呢季球隊四大皆空，聯賽成績一落千丈，只得第六名。早前有傳紅軍會炒咗羅渣士，搵前多蒙特教練高路普嚟教。
羅渣士靠把口保飯碗
不過，佢又爭氣喎，可能口才了得啦，喺周二嘅高層會議入面，𠱁得掂球會主席華拿同埋母公司芬威集團CEO米克哥頓，有得留低。據英媒透露，華拿同米克哥頓都警告羅渣士，如果下季成績冇進步，就一定要走人。𠱁掂高層之後，羅帥就要處理轉會喇，據報利物浦有望簽得成自由身嘅英格蘭國腳占士米拿。
有人趕住轉工或者慶幸唔使被炒，亦有人唔志在，寧願量地都唔想做臭自己個名，講緊嘅係被皇馬炒魷嘅安察洛堤。雖然AC米蘭請佢回巢，但肥安已經公開拒絕，「多謝AC，要拒絕一間我心愛嘅球會的確好難，但我要休息吓，祝佢哋好運啦。」
識睇，一定係睇足英台【英波Live】：
http://soccer.appledaily.com
http://bit.ly/engballlive