講開祖記同巴塞啲老將，來來去去都係保方、派路同沙維，小弟都覺有啲悶，呢次講一講巴塞右閘丹尼爾。不經不覺，佢都32歲。
丹尼爾係個潮人，最近仲剪咗個好似狗屎咁嘅髮型，被人狂笑，雖然佢畀人感覺古古怪怪，但都有顆俠義之心。巴塞前隊友艾比度講過，當佢肝癌嚴重到要接受移植手術嗰陣，丹尼爾主動提議捐個肝畀佢，但艾比度就拒絕咗。
fb講大屠殺被迫刪帖
除咗呢件事，兩個月前係阿美尼亞大屠殺100周年，土耳其嘅前身鄂圖曼帝國殺咗80至150萬阿美尼亞人。土耳其雖然承認大屠殺係發生過，但否認有組織同有預謀嘅種族滅絕。丹尼爾睇唔過眼，喺社交網站度要求土耳其政府正視歷史。不過，丹尼爾呢個舉動仲得失埋巴塞嘅贊助商。呢啲來自土耳其嘅贊助商向巴塞施壓，最後丹尼爾要刪post同道歉。政治壓力、商業壓力之下，就算係球星都無法暢所欲言、為正義發聲。喺呢啲壓力同潛規則下，人嘅正義之心好容易被利益蒙蔽，如果有年輕球員見到敢言嘅丹尼爾最後被封嘴，佢哋會點諗？整整吓，再冇人敢發聲。
最後講一講國際足協，邊個唔知貪腐嚴重，啲錢點用毫無獨立嘅監察制度，主席竟然冇連任限制，流弊重重，但既得利益可以蒙蔽人嘅正義，令某些人裝睡。白禮達辭職，究竟係改革嘅開始，定只係換上一啲黑禮達、藍禮達，換湯不換藥？就睇吓嗰班裝睡嘅人醒唔醒。
文：咖喱