今日係六四事件26周年，相信大家都會風雨不改，去到維園參加燭光集會。每年各團體會做好多六四紀念品，今年工黨就厲害，竟然推出「武器」！即係十大武器之首：摺凳！
其實工黨呢張摺凳只係凳仔，冇乜殺傷力，兩款分別寫有「勿忘初衷」同埋「腰骨要直」嘅凳仔，今晚喺維園現場發售，咁大家參與集會都可以參與得舒服啲。兩款凳仔都係黑色，以藍絲最驚嘅黃色字體寫上兩句標語，由於係人手製，所以每款只得150張左右，除咗坐之外，亦相當有紀念價值。
「民女襟章」賣20元
凳仔之外，工黨亦製作咗500個、分為兩款嘅民主女神襟章，一款係女神手持黃色雨傘，另一款就係印有放喺中大嘅第二代民主女神圖像，戴住嚟參與集會就更加貼題。凳仔同襟章分別賣60蚊同埋20蚊，順道為工黨籌款。