距離政改決戰得番大約兩個星期，事情會唔會出現戲劇性變化，至於提出方案嘅特區政府似乎亦心知不妙，知道方案被否決機會極大，唔單止近來嘅言論開始轉吹淡風，連建制派都覺得政府打定輸數外，八方仲撞到有工人喺公民廣場嘅更亭裝上天眼，準備全天候𥄫實添美道一帶有乜風吹草動。
噚日晏晝兩點半左右，八方路過公民廣場嘅時候，見到兩個工人企咗喺政總東翼閘口嘅更亭上面整嘢。細心一睇，就見到佢哋喺安裝緊部閉路電視，而且唔止一部，係有三部咁多。其中兩部分別向住添美道兩端，另一部就犀利喇，大大個波咁吊咗喺度。八方問過啲熟悉呢類科技嘢嘅人，嗰個大波形閉路電視唔單止夜視能力極強，而且全彩色高清拍攝，畫面仲可以好似電視劇裏面嗰啲咁放大嚟睇。其實與其花錢咁樣睇實條路，不如諗吓點樣修改好個政改方案，還番條真普選路畀市民行好過啦。