正所謂日防夜防家賊難防，日本女星神田UNO昨日被周刊《女性自身》報道佢被一名家傭喺家中盜竊多達27件財物，總值逾120萬港元！神田多年前已經做咗闊太，但佢仲有演出節目同設計婚紗，昨日佢舉行婚紗騷時，就被追問被偷竊事件。
神田話犯人係為佢照顧女兒嘅四個保母中，其中一個佢最信任、任職年期最長嘅60歲女人，佢話前年起發覺成日唔見嘢，起初以為唔記得放咗喺邊，但失物越嚟越多，包括名牌手袋、首飾等，佢仲同該名已視為家人般嘅保母呻話成日唔見嘢，該保母竟然話懷疑係另一家傭所為。神田最終於去年報警，警察喺該保母家中起出所有失物，令神田大受打擊。
神田仲話覺得好對女兒唔住，仲講到喊，但就被網民寸，話佢成日講親自湊女，仲好有湊女心得，但原來僱用咗四個保母！
撰文：李村姑