【今日我至暖】噚日日頭嘅天氣又熱又焗，室外氣溫有成攝氏30℃，但恒基地產（012）主席李兆基（四叔，圖左）經常出入冷氣地方，無論天氣幾熱，好似都同佢冇乜關係。佢噚日出席恒地股東會，喺西裝褸入面，着多一件白色嘅羊毛外套，仲要拉埋拉鏈，唔知以為仲係冬天。不過都啱嘅，四叔已經86歲，一出一入冷氣地方，攝親感冒就唔好喇，健康最重要，細仔李家誠（圖右）都要睇實。