有人說韋家輝的電視劇好殘忍，你看《義不容情》、《大時代》、《馬場大亨》，那一套不是死人冧樓、主角遭遇慘絕人寰？不過，劇集始終也是寫給人看，主角總不會由頭衰到尾，所以方展博在谷底要自殺時，會有師父葉天跳出來救他一命；要大量資金與丁蟹抗衡，又會有李首富念舊情助其一臂。圓滿劇情，在足球世界不只更難搵，而且仲殘忍好多！
俗語有云：「做人要小心收尾幾年」做球員呢？可能要小心「收尾幾場」！你看謝拉特（黑衫）在紅軍「收尾幾場」：晏菲路最後一戰，以為有人畀面？點知球證誤判、水晶宮加兩錢肉緊，終慘負1:3；紅軍生涯最後一戰，史篤城更唔畀面大炒6:1！還有多蒙特教練高路普，告別戰也在德國盃決賽1:3反輸飲恨。說到「告別戰」，我還想到施丹2006年世盃決賽，頭撞馬特拉斯領紅出場；費格遜則被弱隊西布朗搞到幾乎「輸住退休」；最後只幸保5:5和局。大團圓結果？足球世界係冇編劇！
就是上述不完美結局，提醒你足球也是殘酷的現實世界一部份。不過咁，戲集結局真係結局；而足球世界的「結局」，卻是另一段旅程開始，點殘酷都會有新希望。高路普小休後，將迎接新挑戰；至於謝拉特，紅軍迷會否在等有天他完成漫長旅程後，最終返回紅軍做教頭，完成未圓的英超夢？
方栢翹
now足球評述員