世界經濟論壇另一位重量級講者係美國聯儲局前主席伯南克（Ben Bernanke），華華以往只係睇電視或報紙見到佢，原來真人跟上鏡差唔多，佢亦係首度來港，演講一粒鐘，可惜冇接受台下觀眾提問，冇得問佢點睇息口走勢。
伯南克一做8年、舊年初卸任聯儲局主席，有傳佢首場演講嘅報酬有25萬美元（195萬港元），大會今次應該都係重金禮聘伯南克來港演講。
市場關心息口走勢，但伯南克似乎不在其位，不謀其政，噚日冇提美國息口，反而展露幽默一面。佢話，寶貝女Elisa曾經被學校室友問佢爸爸做邊行，Elisa回答話「我爸爸做聯儲局主席。」點知佢同學仔即刻話：「哦，即係格林斯潘啦！」即時引來哄堂大笑，伯南克自嘲，知名度始終不及格林斯潘。
伯南克之後主力講番金融海嘯嘅救市經歷，包括救AIG與雷曼爆煲事件，話當時壓力真係大到不得了。
佢人在香港，都有讚番幾句，佢話香港嘅角色好重要，帶領中國連接世界經濟；佢又預期中國經濟唔會爆煲，相信中央政府有方法搞得掂。