長和（001）與和黃（已除牌）完成重組，分拆出來作介紹上市嘅長實地產（1113）今日掛牌，不過大股東超人李嘉誠決定低調，長地今日冇掛牌儀式，大家唔會見到超人去港交所（388）展覽廳敲鑼，超人可能諗住跟小超人李澤鉅一齊望住大利是機賀長地上市兼完成整個重組計劃啩。
其實長地冇上市儀式都唔出奇，長地只係長和與和黃重組嘅一部份，而且最近政改議題鬧得沸騰騰，超人高調現身，肯定被人問佢如果政改唔獲通過咁點樣之類，佢都就政改講過幾次，或者唔想再講。
超人唔敲鑼唔緊要，風水師麥玲玲指，今日係執日，雖然冇開日、滿日咁理想，但都屬於好日，有利新掛牌嘅公司，長線走勢一定向好。順便利申，麥玲玲都係長和與長地小股東嚟㗎。