在潘頓及雷神左右夾擊下，韋達氣勢大不如前。不過今季上述兩大勁敵曾三度齊齊缺陣，韋達每次都交足功課，例起孖而回，每次咁啱均取兩冠兩位，做足本份。今次谷草夜馬，潘頓及雷神均停賽，韋達近乎一人獨大，胯下惡馬包括「樂趣」、「家品大王」及「魅力星」等，有機會再次起孖。
頭場「樂趣」落到五班後兩戰一亞一殿，表現漸見穩定，證明評分已找到支持點，後追馬排12檔影響不算太大，若因外檔而有分頭便更值博。
第五場「家品大王」轉倉後兩戰兩亞演出準，今次再無超班馬「有心人」在陣，加上賀廐近五戰四次贏馬，此駒必拼有力開齋。
另一方面，告達理與韋達今季在谷草合作15次，當中10次跑入前四名，今戰又交第四場「環保戰士」及第七場「魅力星」予韋達上陣，後駒上仗配雷神，今仗趁雷神停賽，韋達有得騎唔搏就奇，交回年初跟出爐遮打盃盟主「喜蓮巨星」串Q水準，便有力打開今季勝門。