護老院變虐老院，仲要打「劍橋」呢個牌頭，恐怕徐志摩死咗都激翻生，念一句：我揮一揮拳頭，不帶走一片雲彩。
虐老本已賤，但借社會悲歌抽水企圖（但失敗地）撈政治油水嘅人，更加係賤格中嘅XO！說甚麼虐老係因為「土地供應不足問題」？潛台詞可能係「我卸一卸衣膊，話知你走去反枱」，又或係「若要老人好，要畀我動土」，第時我要開天闢地，你班刁民敢阻我？噢～你虐老！
既然特首帶頭將「土地供應不足問題」化做萬能Key，千頌C都認真思考過，查實佢呢個解釋又唔係冇道理，蝴蝶效應嘅嘢，你真係識條毛咩？以下幾個現象，相信的確係由土地問題衍生（好似係）。
1、鼻敏感患者增加
劍橋護老院虐老被釘牌，搞到老人家要轉院。傳媒早前野生捕獲一個孝子，帶埋原本住劍橋嘅媽媽撲新院舍，其間仲怪傳媒「原本好好哋，俾你哋搞到要頻撲。」
嗱！一聽呢位人兄嘅語氣，就知佢幾咁憂心，媽媽冇地方住，你話佢點算？果然係一名孝子！我知你實諗點解佢咁孝順唔接媽媽一齊住，我唔准你質疑佢！一定唔係佢嘅錯，係「土地供應不足」嘅錯。你睇佢一表人才咁孝順，如果夠地方一定會同媽媽一齊住啦！咁媽媽就唔使因為劍橋釘牌搵地方搬，佢就唔使揸車四圍走，排出更多二氧化碳，令空氣污染惡化，令香港人健康差咗。一眾患鼻敏感嘅朋友，要怪就怪香港唔夠地啦。
2、日本公廁污糟咗
留名跟進劉鳴煒話，上唔到車係因為後生仔唔肯去少啲日本。真係冤枉呀法官大人。去日本唔係因為我有錢，而係因為我窮。日圓係咁跌，買嘢六五折。只要大手掃入一年所需身外物，扣埋機票酒店，比喺香港買，除笨有精。香港人多咗，廁所污糟是常識吧？歸根究柢，又係因為「土地供應不足」，令香港生活指數貴，逼你去日本消費，仲消費埋佢個公廁！以後去日本，見到廁所紙巾四圍hea，水迹一撻撻，唔好嬲，此全因香港土地供應不足。
3、有東江水飲唔感恩
港鐵潑婦大庭廣眾對慢必性傾向惡言相向，令唔少網民都戥慢必唔抵。大家唔好咁嬲住，呢個好可能都唔係兩位女士嘅錯，錯就錯在「土地供應不足」。大家都聽到，兩位女士言語間多次提到尺寸問題，顯然尺寸對佢哋來講意義極大。存有咁嘅價值觀唔係錯，香港寸金尺土，樓宇呎價萬萬聲，對尺寸敏感度高係自然反應。加埋供樓壓力大，令佢忍唔住喺地鐵做出教壞細路行為。家長擔心小朋友喺街學壞，心情唔好，自然唔記得凡事感恩，唔記得查實廣東同胞對香港有特殊照顧，仲衰到佢供我東江水，我覺得被昆水。殊途同歸，又係「土地供應不足」嘅錯。
作為香港人，當然要以特首馬首是瞻。以後毋須再祈禱告解，因為無論你搵唔到工，搵唔到老公，返工有勞冇功，阿仔讀書唔用功，一切都係土地供應不足問題。一切，都係因為香港塊地太硬！
千頌C
http://fb.com/winbigwok
本欄隔周三刊登