為咗慶祝上月母親節同埋即將來臨嘅父親節，自由黨附屬組織自由之友，噚晚搞咗場頌親恩晚宴，筵開70幾圍。
自由黨嘅黨魁方剛、三位榮譽主席田北俊、周梁淑怡、劉健儀、主席鍾國斌都有去捧場。
今年父親節係21號，撞啱係政改表決之後嘅周日，八方問田少準備點過，田少即刻話：「我哋諗住17號政改呀，邊個諗住乜嘢父親節吖？」佢仲有啲失望話當諗到17號起，幾日要辯論政改，真係「諗完都冇心機喇」，而佢近年嘅父親節都只係做「陪襯品」，即係趁啲孫同佢個仔及女婿慶祝嘅時候，搭單慶祝埋。
噚晚田少魅力四射，話說噚晚晚宴有「大王」安德尊做嘉賓，事關當年一手提拔大王嘅就係周梁淑儀。
為咗多謝周太，大王拉咗周太一齊唱咗首《今晚夜》。周太亦相當醒目，唱完就乘勢叫埋田少上台，叫佢獻唱首本名曲《舊歡如夢》。