本土派成日鬧左膠泛民淨係識搞唱Ｋ遊行，冇成果之後畀啲掌聲自己，之後就和平散去，不過到本土派自己搞又點呢？原來同左膠係冇乜分別！呢個唔係花生友講，而係本土派自己友怒插本土反政改遊行！
話說中大本土學社、科大行動、本土思潮等多個本土團體，喺5月30日搞嘅反政改遊行，究竟有幾多人知同關心，花生友就唔講，傳媒話有百幾人參加，佢哋就話有500人，但呢個都唔緊要，最重要嘅係，竟然有自稱係搞手嘅人喺高登發帖，總結530本土反政改遊行，聲稱「今日既（嘅）人數已經合格」、又話呢500人係「出黎（嚟）曬（晒）馬比（俾）泛民睇，等泛民唔好覺得我地（哋）本土派係垃圾，以及比（俾）公眾認識下我地（哋）本土既（嘅）力量」，仲為佢哋一見人衝立法會就宣佈解散辯護，「夾硬要衝只會死傷慘重」。
高登仔：廢過左膠
有左膠社運人士同花生友講，佢睇完笑到收唔到聲之餘，原本諗住回兩句潤下佢哋，點知佢未出手，班本土高登仔已圍插個搞手，「搞手希望搞一個冇示威效果既（嘅）抗爭行動、左膠式行動、左膠式抽水」，「本土x真係好x柒，得百幾友已經柒， 仲要拆完板即刻逃走，勇乜嘢武？當初唔係日x夜x左膠廢架（㗎）咩？點x知你地（哋）仲x廢」，結果變成一場本土友自己罵戰！嗰個左膠社運人士話，班本土成日話佢哋廢，「到佢哋自己掛頭牌搞行動，就仲廢過我哋呢班廢嘅！好心佢哋自己檢討吓喇！」
花生友