現年42歲的孫耀威和女友陳美詩拍拖6年，早前老孫在微博晒6周年甜蜜合照並留言：「6年了，感恩！珍惜！迎接7年之癢的開始，哈哈！我好像已經癢癢癢了！」原來他的癢是指結婚，本報收到消息，老孫和女友已秘密註冊，結束7年之癢！
晒女友賺錢買花戴
記者昨日致電恭喜老孫結婚了，他避忌說：「吓！點解咁問。幾時呀？我啱啱噚晚喺上海返，忙到阿媽都唔認得，突然間咁問……」記者再三追問是否結婚了？老孫說：「我有諗嘅，但好多嘢搞緊，真係有呢日會同大家講，之前一直話唔想大事鋪張，覺得好老土好麻煩，不過見人哋搞得好開心，都考慮會唔會搞大party。」問是否結婚後才公開？他支吾說：「詳情到時再定，有消息再話你知。」
問結婚會否是今年內的事？老孫說：「我諗唔會，因為今年好多嘢搞，有啲演藝大計諗緊想做，不過年年都話出年結婚，費事開空頭支票，但我係有心想做嘅，年紀都唔細，42歲，係有咁嘅需要，睇吓點搞囉。」求婚了嗎？他說：「如果有即係做咗啦，但我都話今年未有plan，點會有呢啲前奏呢，睇吓時間啦，基本上我哋兩個有默契，因為我實在太多嘢煩緊，好多嘢做，所以暫時唔係好多心思諗呢樣嘢，不過佢都好體諒我。」
問到女友離開無綫後的近況，他說：「佢𠵱家冇經理人公司，之前喺台灣、內地對我有興趣嘅公司，我都有介紹佢識，𠵱家有台劇、內地劇傾緊，賺吓錢買花戴。」
採訪：皓騫