股神畢菲特一年一度嘅慈善午餐拍賣開始咗未夠兩日，叫價已經去到超過100萬美金，按照呢個勢頭，今年分分鐘會打破2012年創下350萬美元（2,730萬港元）嘅紀錄喎。
拍賣喺美國時間星期日凌晨開始，底價2.5萬美元，今個星期五晚10點半結束。唔知係咪過去一年股市暢旺，各位善長賺得多，手都鬆啲，截至美國時間星期二上午8點，已有5位競投者，出咗10口價，叫到100.05萬美元（約780萬港元）。
股神午餐拍賣已舉辦15年，主要為慈善機構Glide籌款，至今合共籌得1,780萬美元，歷來最高成交價係2012年，達到350萬美元。
Glide方面就話，一早估到大家今年會踴躍競投，但咁快升到100萬美金真係令人喜出望外。