啱啱為澳門賭業猛人周焯華（洗米華）剖腹生咗7磅「小米女」Damiana嘅正印陳慧玲（Heidi），𠵱家仲喺醫院休息緊，聽講呢兩日會出院返屋企坐月㖭！昨日傍晚，洗米華爸爸同埋孫女，坐住架七人車去探Heidi，臨走嗰陣又俾人問洗米華嘅蹤影，佢話：「佢唔喺香港，出咗國！」有人即刻問佢係咪去咗英國呀？洗米華爸爸耍晒手話：「唔知呀！唔知呀！」但據知，洗米華每日收工後都由澳門到醫院探望洗米嫂，翌日早上又返回澳門工作。另外，白雪仙亦都有現身醫院。
柏豪晒洗米華童年照
噚日有周刊報道，洗米華搵咗李丞責幫囡囡改咗中文名叫善潼，仲有Heidi嘅閨蜜話Heidi見到丈夫咁愛錫佢同囡囡，好感動咁話：「冇人可以拆得散呢個家，錢買唔到真愛。」此外，洗米華嘅大仔周柏豪，噚日喺ig擺咗張細路仔相，竟然係佢爹哋細個嗰時嘅相，個樣同𠵱家分別唔大。
撰文：馮仁昭