近日馬圈剛上演季內最後一場一級賽遮打盃，當日不老美人吳婉芳愛駒「喜蓮巨星」贏馬後，芳妹同一位貴氣女士，撓晒手行去草地拉頭馬，佢就係吳婉芳老公胡家驊嘅姑姐胡慕芳，亦正係馬會副主席周永健太太。
到頒獎之時，周永健代表馬會，頒畀姪媳芳妹及另一馬主姪仔胡家驃等人，仲禮節性一親芳妹面珠仔，一家人過咗好難忘嘅一天。
胡慕芳係著名慈善家胡兆熾千金，家陣係和記黃埔副集團董事總經理，乃超級女強人；遮打盃睇住一班姪仔、姪媳攞威，佢同老公周永健當然亦不甘後人。今期（3日）夜馬周永健就有「勁感」接棒出擊，隻馬上仗泥地雖然毫無走勢，但跑番快活谷完全唔同講法，呢匹馬19戰谷草得2冠11位，上名率近七成。前仗同程一哩只輸畀「喜喜寶」及「川河首駒」兩匹惡馬，今次唞咗個幾月養精蓄銳，攞定保護權等今場，絕對係黃金機會。唔知吳婉芳夫婦會唔會現身，同姑姐、姑丈打氣呢？