環境局在報紙刊登廣告，請市民參加公眾論壇，討論兩電，即電網開放，利潤管制，減少排放，環保再生能源諸如此類嘅問題。呢類公開諮詢會相等於美國政治人物之townhall meeting，普羅市民參與，同區內之眾議員討論區內問題，政客叫做落區聽民意。香港呢十幾年來時興公眾諮詢，辦類似公眾論壇成為指定動作，環境局如果唔做番三五七次，就會俾環保團體批評假諮詢，黑箱作業嘅嘞。
但呢類諮詢會唔會真係有用呢？未必㗎，左丁山主持過一啲公眾諮詢論壇及聚焦小組（focus group）討論，發覺聽過兩次，就知道內容次次一樣，參加者講來講去都走不出事先公關顧問預期嘅問題範圍，香港九龍新界都一樣，不過就因此發現，一啲社工/壓力團體最熱心出席，港九新界都見到佢地嘅代表出席或陪同該區市民出席，代表埋市民發言，因為啲阿婆阿嬸對住個咪就無法子講得清楚。佢地係熱心呀，但如果話諮詢論壇聽到嘅意見就係大部份市民嘅意見，作為政府施政參考嘅話，就比較牙煙嘞。
參加電力發展論壇，唔駛到場都可以想像得到係環團，環保界聲音最大，必然講及開放電網，增加再生能源發電，減電費降低利潤回報率等等。講到再生能源，在香港唯一可行嘅應該係太陽能（嘩，唔好想到去漢能薄膜呢隻股票呀），不少人成日講太陽能，實則自己起番間獨立屋，就可以試吓用太陽能，代替安裝電燈公司電力，但講到香港，不但地方用晒嚟起樓，專家話要用18個維多利亞公園鋪滿太陽能板，先至可以供應全港1 %電力，香港何來有18個維園咁奢侈？兩星期前睇BBC新聞報導有一輯關於日本某縣就係試用太陽能，從BBC畫面可見，嗰個太陽能計劃可能真係用太陽能板鋪滿18個維多利亞公園，但BBC記者話該縣連續兩三個星期天陰無太陽噃，於是無電可用，要倚賴番傳統發電，咁就令到電費貴好多嘞（因為同時要維持兩套發電設施，以防打風落雨冇陽光）。香港過往兩個星期咪見大雨多於見太陽囉，環保人士講再生能源當然係好，但不能過於理想化，自己在新界起間村屋用太陽能就算嘞，唔好誇大其效用。黃錦星局長唔會傻到在全港推動太陽能發電呀嗎？