手袋真係可以令好多女士瘋狂，早排C字頭嘅名貴手袋話因應滙水跌而減價，即刻引來大批女士排長龍掃袋，愛馬仕（Hermès）嘅手袋有錢都未必買到，就更加吸引。噚日國際拍賣行佳士得舉行一場手袋與配飾拍賣，其中一個亮面紫紅色Porosus鱷魚皮柏金包（Birkin）就以172萬元成交，破咗2011年另一個Hermès手袋嘅拍賣紀錄。
根據資料，2011年美國一間拍賣行，曾經有一個Hermès紅色鱷魚皮Birkin以159萬元成交，佳士得噚日拍出嘅手袋就刷新紀錄。同時，佳士得噚日有一個黑色Porosus鱷魚皮凱莉包（Kelly）以112萬元成交，亦創Kelly袋嘅拍賣紀錄。都說手袋魔力驚人，幾貴都有人願意出錢買。