阿仙奴上周六順利衞冕英足盃，周日就喺倫敦搞勝利巡遊，「兵工廠之子」韋舒亞玩得興起，就煽動球迷寸北倫敦死敵熱刺，搞到官網直播暫停，更引起阿仙奴同熱刺球迷罵戰，好心23歲仔嘅韋舒亞就修心養性，唔好再搞咁多麻煩嘢激親「契爺」雲格啦。
官台直播被逼暫停
兵工廠周日舉行英足盃冠軍巡遊，各球員喺開篷巴士輪流發言搞吓氣氛，到韋舒亞揸咪，以佢一向衰仔往績，又點會唔搞事，就向車下大批廠迷問：「你哋覺得熱刺係咩？」球迷就回應：「屎」，咁韋舒亞跟住就話：「咁屎即係咩？」球迷又回應：「熱刺！」之後佢哋仲唱歌寸熱刺，歌詞帶粗口，搞到阿仙奴官方電視台都要停一停直播，費事挑起兩隊不和情緒，會方事後亦同熱刺道歉。
韋舒亞九歲已經加入阿仙奴青年軍，對兵工廠當然有好深感情，自然亦都對同處北倫敦嘅熱刺好仇視，不過自己大喜日子無端端寸人就有啲無謂，結果仲引起網上罵戰，有撐熱刺球迷就話阿仙奴今季兩鬥只係拎到1和1負不勝戰績，咁比起屎，阿仙奴係咩？不過廠迷就貼番張今季英超積分表，表達第三位嘅阿仙奴，足足比第五位嘅熱刺多11分。
其實韋舒亞上周六夜捧盃之後，就聯合大批隊友夜蒲，連輸波嘅維拉、人氣新星基亞利殊都畀面出席。韋舒亞蒲精上身，到星期日朝早6點先同左閘基蘭基比斯離開，之後就出席巡遊，唔知佢係唔係酒氣未過亂講嘢。
講完唔開心嘢，都講吓阿仙奴開心嘢，門將施捷斯尼力保清白身，幫球隊決賽贏4:0，佢就喺個人instagram留言，希望繼續為球隊贏更多獎盃，間接打破佢離隊傳言，但如果阿仙奴真係收購車仔門將施治，施捷斯尼已經失去聯賽把關機會，會唔會連盃賽都冇得踢？而幫球隊先開紀錄嘅禾確特，亦都話對續約有信心。
識睇，一定係睇足英台【英波Live】：
http://soccer.appledaily.com
http://bit.ly/engballlive