恒地（012）主席李兆基（四叔）噚日出席同系煤氣（003）股東會時，只招呼傳媒大約10分鐘，仲要淨係講煤氣相關事宜，話有嘢留番今日喺恒地股東會之後先講，原來真係有蠱惑，同系恒基發展（097）噚晚宣佈，四叔下月1日起唔做主席兼董事總經理，將呢兩個位交畀細仔李家誠，佢只留任執董。
四叔舊年中已經將美麗華（071）主席一職交畀細仔李家誠，自己改任非執董；今年就將轉型做百貨嘅恒發交埋畀細仔。但兩間公司市值加埋得100億元，市場最關注，四叔幾時將重磅嘅煤氣與恒地嘅主席職位交畀阿仔，由大仔李家傑定係細仔接掌呢？四叔會否一年交出一個主席職位呢？