有啲人從來唔憂冇好工做，賓尼迪斯（圖）來季準備接手「銀河艦隊」皇馬，巴塞高層暫時應該鬆一口氣。
賓尼迪斯，利迷當然對佢推崇備至，不過佢喺英超教過兩大會，畀人印象係踢法較悶同常叫班主開水喉擴軍。西班牙人近年飄泊，自從05年為紅軍攞到歐聯，翌季為紅軍添足總盃後；真正有份量嘅冠軍獎盃唔多。國米嘅世界冠軍球會盃、做半季車仔替工時攞咗嘅歐霸盃、到上季南下意大利拿玻里，攞到意大利盃後，今季季初藍軍一出「歐聯外」即出局，連埋周日煞科戰失落歐聯席位，賓帥今季開壞頭、臨尾香。
婉拒韋斯咸年薪六百萬鎊聘約，準備教世上最有錢球會皇馬，喺外邊打滾逾十年嘅賓帥，周日拿玻里鬥拉素生死戰嘅記招，急不及待表明季尾約滿離隊，附老婆思鄉等原因。馬後炮睇，對拿軍主場大敗拉素失落歐聯參賽權不無影響。無意抵譭意甲、貶低拿玻里，但38歲嘅東尼，可並列今屆意甲神射手；加埋賓帥今季最大收購，只係用咗約一千萬鎊，簽下森多利亞嘅年輕前鋒加比亞甸尼，意大利南部只係55歲嘅賓帥領軍生涯一個中轉站。
賓帥近日高調表示自己非悶蛋領隊，仲話今屆帶領拿玻里喺全部賽事計，攻入過百球。翻睇拿玻里，近兩屆問題喺防守，上季聯賽排第三，但失波多過亞軍羅馬14球；剛煞科球季，最後兩仗連敗後埋單得第五，但失波竟然僅比尾四阿特蘭大同尾五烏甸尼斯只少三球及兩球，賓帥好似變咗漏水領隊。
今季聯賽攻入驚人48球嘅C朗（基斯坦奴朗拿度），帶領隊友賓施馬及加里夫巴利，呢個進攻鐵三角，共入76球，係皇馬近三季三前鋒總計聯賽入波最多嘅一屆。同拿玻里一樣，皇馬刻下問題反而喺防守，中堅比比同沙治奧拉莫斯唔再穩陣；嚟緊點樣拉近新東家、今季聯賽比巴塞多失17球嘅差距，又要保持皇馬嘅悅目足球傳統，賓帥大考驗。畢竟美斯帶領嘅巴塞三條A，都比30歲嘅C朗後生，巴塞王朝啱啱建立，唔似一季即散。
現時流落土耳其下游球隊嘅前紅軍前鋒賴恩巴布，當知道賓帥要教皇馬，喺社交網站寸對方，「佢（賓帥）將會令C朗成為出色嘅守將。」
麻煩會長佩雷斯搵得賓帥，應該想皇馬學今季車仔多啲，成績大過天，如果教到C朗識埋防守，又唔拘喎！
文：波神