慳家係美德，費清幼承家訓，尤其係喺超市，如果買冰鮮肉類，都會睇吓有冇特價。所謂特價，其實多數係一啲臨近到期嘅肉類食材，例如可能係一、兩日後就到期，甚至聽日就到，但其實只要盡快喺到期日前煮嚟食，就冇問題啦。
#忌解凍後翻雪
不過，因為要盡快食，所以就算有幾包係特價，都只可以買一、兩包，其他幾唔捨得都要放手，唔係買多咗盞浪費，唔通真係晾起佢天然生曬做臘肉咩。
IVE（柴灣）應用科學系高級講師方麗影都算係慳妹一名，就同費清分享一個慳家小貼士：「只要肉類食材未過期，買返屋企後，立即放入冰格冷藏，其實可以貯存個幾月，仍然可以食得好安全。」
不過，佢話要注意，冷藏溫度要穩定，千祈唔好將肉類攞出嚟解凍，然後又再放入冰格內翻雪。解凍再冷藏除咗會有衞生問題，對肉質口感都有影響。
如果嚿肉太大塊，一餐食唔晒，就喺冷藏前切開，每一餐份量一份，每次就攞一份出嚟煮，咁樣慳慳埋埋，學劉公子話齋，隨時業主都有得你做。
費清
＃要生計，也要生活＃毋忘初衷