劉皇發噚日由坐咗35年嘅鄉議局主席嘅一職退下來，有「新界王」之稱嘅劉皇發年屆79歲，早排話因為感冒入院，噚日係佢出院後首次現身。副主席張學明話，希望發叔日後多到鄉議局專為長者而設嘅「吹水館」，多啲嚟吹水，多談新界事務。咁講法，劉皇發隨時由新界王變成吹水王。
發叔噚日只係短短現身咗半小時，但步履明顯大不如前，出入均要由人扶住，充當枴杖嘅雨傘全程不離手。自動當選嘅「選舉」完咗之後，發叔急急腳離開，回應話自己健康冇大礙，身邊負責攙扶發叔嘅鄉紳話，要多等一兩個星期，發叔先至會接受訪問。
究竟發叔嘅身體如何？喺記者會上，張學明同林偉強分別代發叔個仔劉業強代答。學明話，發叔已經79歲，長者行動不便正常不過，強調發叔嘅精神狀態同思維完全冇問題，希望佢繼續「操fit啲」，仲話希望發叔日後多啲到專畀長者過日辰嘅鄉議局吹水館（鄉議局分區聯絡處）吹水，閒話家常，就新界事務吹水。
劉業強講英文洗土氣
林偉強亦補充，透露發叔早喺半年前決定換屆嘅問題，希望培育年輕新一輩，所以交棒，暗示唔係健康有問題先交棒。雖然記者問緊發叔健康問題，本來最有資格回應梗係囝囝劉業強啦，但健康問題始終係敏感問題，由經驗夠嘅世叔伯回應比較好。不過劉業強喺英國名牌倫敦政治經濟學院讀數學與統計，噚日喺記者會上負責回應英文問題，洗脫鄉議局嘅土氣鄉紳形象，相信英文台嘅記者亦都會好歡迎。
李八方
mailto:[email protected]