這天第七場遮打盃，告東尼旗下之「喜蓮巨星」氣走大摩馬房的「多名利」，但大摩始終係盃王，總唔會錯過任何捧盃機會。第九場1200米三級賽沙田銀瓶，結果大摩憑「新力風」及李嘉欣愛駒「一寶」包辦馬房連贏位，「新力風」在雷神胯下彈甩對手逾一馬位，3.4倍大熱奪標。
「新力風」來港前由大摩自資擁有，曾兩度一級賽入Q，名氣好大，後來佢賣咗給相熟馬主黃良柏，後者一心以呢匹四歲馬染指國際級短途大賽，今日係「新力風」第三次在港出賽，結果藉輕磅之利捧盃。
「一寶」今場由貝湯美後上跑第二，呢位大摩愛將今日重臨客串，兩場戲肉都做二奶，「多名利」飲恨遮打盃已經夠慘，「一寶」姍姍來遲失落沙田銀瓶，亦搞到馬主許晉亨、李嘉欣夫婦打破唔到近期頭馬荒。呢對城中名人夫婦，上個周日出「貳寶」影相不敵「旅遊大哥」屈居亞軍，今日許晉亨有份為老友吳婉芳之「喜蓮巨星」遮打盃拉頭馬，可惜戥人開心自己卻空手而回。
今場苗廐「好健康」得季軍，摩廐「同個夢想」跑第四，大摩差點包辦三重彩。