好多熱戀情侶或夫妻遊法國巴黎，都會去原名巴黎藝術橋嘅心鎖橋打卡，順便喺橋度扣上鎖，希望將至愛或另一半箍實，但呢條橋咁多年嚟累積咗逾70萬個「愛情鎖」，令大橋受到破壞，巴黎市政府決定今日開始剪鎖保橋行動。
情侶聖地鬧舊愛
導演阮世生去年拍電影《巴黎假期》時，當然有安排男主角古天樂去呢個名勝拍攝，古仔雖然去過巴黎幾次，但踏足心鎖橋都係第一次，古仔知道今日開始剪鎖，佢話：「超過70萬個心鎖，負荷太重，舊年仲有啲欄杆爛咗，為咗大家安全先咁做。」
古仔話舊年到訪時，已經知道剪鎖後欄杆會用玻璃取締，以後大家冇機會喺上面扣鎖，嗰次拍戲順路一遊，古仔都有叫助手幫佢影相留念。古仔話嗰日喺橋上面，佢要同扮舊愛嘅內地演員劉梓妍拍攝解開心鎖嘅戲份，古仔仲依劇情鬧咗舊愛一餐，佢哋拍得好投入，吸引途人圍觀，仲有華裔遊客認出古仔，八卦追問劇情。
撰文：馮仁昭