渣打大中華區行政總裁洪丕正噚日現身沙田馬場，事關第7場係渣打冠軍暨遮打盃，洪丕正喺賽前大派貼士，話睇好呢場1、4、8號馬，分別係「將男」、「喜蓮巨星」同埋「好靚仔」，仲話諧音「一世發」夠好意頭㖭！
洪丕正算係有眼光，呢場賽事最終由4號「喜蓮巨星」跑出，1號「將男」都跑「梗頸四」。
可惜，現場唔少記者朋友誤會咗洪丕正意思，好多人買咗「1、4、8單T」或者「1、4、8位置Q」，結果咪輸咗囉！
其實，分開買三隻馬獨贏，當每隻買10蚊，成本都只係30蚊，4號跑出，呢隻馬獨贏賠率係1賠7.6，即係賠76蚊，都有賺46蚊，可以簡單食餐飯。
今次幫咗馬會鋪草皮唔緊要，下次就會問清楚洪丕正究竟叫大家買獨贏定係想點囉。