哈爾濱電氣（1133）揸住嘅A股投資等值，幾乎追上集團H股嘅總市值，手頭上仲有過百億元人仔嘅現金，睇哈電超級銀彈底下，遲早要發圍。
按控股情況，哈電揸咗大唐A股（滬601991）1.17億股、國電電力（滬600795）1.42億股，同蒙電華能（滬600863）9,800萬股。三股由上年尾哈電年結後，齊齊發力，全部翻半番，哈電應佔權益等值31億港元，哈電股價仲潛喺八年大底，H股市值44億元咁大把！
超級現金牛遲早發圍
又哈電到上年尾揸現金147億元人仔，折約184億港元（下同），得銀行借款14.8億元，就算計埋公司債券、欠控股公司款60.6億元，債項75.5億元，哈電淨現金仍然高達72億元，係H股市值嘅1.6倍！即時睇到亦諗到嘅係，哈電市值細奀到痹，集團又有超級銀彈優勢，遲早要搞嘢搞發圍。
核電係哈電主打瓣數之一，據業內人士講，祖國到2020年前，投資落新核電瓣數約5,000億元人仔，年均投資額800億至1,000億元人仔。睇到嘅係，隨住阿爺開綠燈，喺核電投資額度，唔細得過鐵路投資瓣數，就算哈電唔走出去，單係喺祖國市場呢個大餅，哈電都有排食，藉住國策，谷底翻身。
咪扯咁遠，哈電未計手上所揸上邊三隻A股上年尾到家陣再增值，現價（6.53元）PB得0.57倍，場內行家東方電氣（1072）1.4倍PB、上海電氣（2727）2.4倍PB、中廣核（1816）3.3倍PB，祖國行家中核科技（深000777）PB，更加高達15倍！哈電起碼平咗60%。又連埋A股投資增值，嚟緊半年度成績單，哈電亦有得炒盈喜。呢轉煲哈電，翻一番到13蚊，PB先講緊得1倍多啲，都仲未有耐追到最近磅嘅東方電氣。
錢雋
細價股專家
本欄逢周一、三、五刊出