Citibank七人足球賽噚日煞科，五屆冠軍阿士東維拉喺銀盾四強出局，但呢班後生仔賽後好識做，向球迷大派紀念品，九號仔施拿斯（Jerell Sellars）連條底褲都送埋出去，球迷見佢送得出亦唔介意照收。
今屆賽事有唔少亮點，其中一個就係意外跑出嘅「港會紐亞」。呢位門神叫Freddie Toomer，控球能力唔錯，仲經常帶波殺到中圈助攻，唔少觀眾都話佢似德國門神紐亞。港會噚日爆冷贏到銀碟，真係靠晒佢一個救全家，三場波救咗兩球12碼，領軍兩次射贏對手，包括決賽擊敗李斯特城。翻查足總網頁，Freddie原來冇註冊，一眾港超球隊不如諗諗呢位23歲神龍？
馬體會稱霸七人賽
主賽就相當激烈，首次出戰嘅馬德里體育會噚日先喺淘汰賽加時贏傑志，到四強險勝威靈頓鳳凰，決賽喺落後兩球劣勢下追成2:2；加時四對四突然死亡，第一個攻勢就由踢緊馬體會B隊嘅艾朗素勁射破網，以3:2反勝英超韋斯咸，首次參賽就封王喇！港超流浪亦標到個尾會，喺銀盾決賽3:1擊敗友誼聯。
至於名人賽盃賽，熱門花旗銀行明星隊喺四強輸畀由保羅、馬查度同高尼路領軍嘅三軍；後者去到決賽仲以2:1擊敗禾辛特男童會，難怪捧盃時球員開心到唱歌又跳舞。
