上周六係歐洲盃賽之夜，除咗英足盃之外，仲有德盃、法足盃、蘇足盃同埋西班牙盃決賽上演。西盃決賽巴塞隆拿喺自己地頭迎戰畢爾包，由美斯神技金球揭開序幕，無驚無險贏3:1，三冠王過埋第二關，劍指周六對祖雲達斯嘅歐聯決賽。
MSN成最強組合
要數近10年西班牙盃最精采嘅金球，全部都關美斯事。2007年四強首回合，美斯對住基達菲連過五個對手之後射入，助巴塞贏5:2，精采程度可以同馬勒當拿喺86年世盃對英格蘭一扭六嗰球媲美；上年1月16強次回合，對手又係基達菲，美斯中路突破力壓四名守將，過埋龍門射入。
經過上周六決賽之後，美斯又多一個經典入球，鬥畢爾包喺開賽20分鐘先開紀錄，佢先喺右路扭過三個球員，殺入禁區之後面對敵衞拿樸迪輕輕一扣又擺脫埋，再喺另一個畢包球員殺到前左腳射門搞掂。呢球波最得人驚係美斯唔靠速度爆過對手，純粹係技術嘅表現。
巴塞之後喺36分鐘由尼馬接應蘇亞雷斯橫傳射入；換邊後到74分鐘美斯再入一球。大局已定下，畢包喺79分鐘由伊拿基威廉斯破蛋，但都無阻巴塞封王。巴塞三叉戟「MSN」喺今季加埋已經入咗120球，打破咗11/12球季皇馬嘅C朗、希古恩加賓施馬加埋118球紀錄，成為西班牙足球歷史上火力最強嘅三人組合。
嗱，之所以唔少球迷視美斯為當今最勁球王，係因為佢啲波好睇之餘又夠晒實際，隊友尼馬就爭少少。比賽剩番幾分鐘就完場，尼馬喺底線對住布斯天沙，想嚟一招「彩虹過人」，用雙腳夾起個波，笠過對手突破，點知布斯天沙惱羞成怒推尼馬落地，仲嬲到係咁鬧佢幾乎講手。其實當時巴塞都贏梗，連隊友碧基喺賽後都話冇必要咁樣炫耀球技；不過尼馬就好少理，話堅持唔會改變自己風格。
安歷基有望追平哥帥
搞掂埋西盃，巴塞距離三冠王只差周六歐聯一步，少帥安歷基有機會成為繼08/09球季嘅哥迪奧拿之後，第一季上任就贏三冠嘅教練，佢喺賽後話：「有美斯真係好幸運嘅事，佢入嘅第一球簡直係嚟自外太空。我哋渴望贏埋歐聯，不過祖雲達斯絕對唔容易應付。」美斯喺下半季踢到曉飛咁，加埋尼馬同埋阿蘇，要贏埋歐聯冠軍，似乎唔係難事。
識睇，一定係睇足英台【英波Live】：
http://soccer.appledaily.com
http://bit.ly/engballlive