雖然有人話擁有名牌手袋，唔代表可為女士提升內在價值。但係日本女仔就話，有個名牌包包可以幫你荷包升值。
上個禮拜日圓低見6.2算，唔只去日本玩嘅港人開心，日本二手名牌舖頭亦興奮。今年初起，多款名牌手錶同手袋為抵銷日圓下跌影響而加價。分別喺東京、大阪同京都有分店嘅KOMEHYO，日圓跌反而令更多日本女士放售手袋或名錶，因為加價潮後，賣包包令佢哋套現更多。
不過，人稱「渡邊太太」嘅散戶今次炒滙出師不利，仲睇錯邊搞到坐大艇。有報道話日本四間大型外滙孖展交易商，上月20號止嘅一個禮拜內賣出50億美元，折合390億港元，2012年11月推行安倍經濟學後規模最大。美元長倉比率亦由今年1月嘅高位大跌六成。
而渡邊太太亦認為日本央行總裁黑田東彥無意擴大量寬嘅言論，同埋日圓喺119至121水平橫行一段時間，認為日圓滙價見底，所以一窩蜂喺122美元水平大手吸納。點知日圓上星期反其道而行，28號更報124.47，創12年半最低。渡邊太太們押錯注，市場人士估計美元再現升勢，佢哋將會狠狠地沽美元，令美元受壓。雖然渡邊太太都係散戶，但佢哋集結嘅力量唔可以低估，渡邊太太喺滙市交易佔整體交易三成。今次沽美元損手都未令佢哋撤走，渡邊太太已經轉移目標轉追美債。
C+B
本欄逢周一刊出