在沙田馬場有應酬，講時事股票多過講馬，輸錢係意料中事，因說話太多就不能集中，走寶兩三場就已經大嘆「蘇州過後冇艇搭」，只能輸少當贏咯。
坐在旁邊嘅係一位退休嘅慈善機構總理，喺香港地，做得乜乜醫院總理，肯定係有錢之人，每年可以捐起碼一百萬元而面不改容嘅，如果唔係富二代就係白手興家嘅老闆。左丁山旁邊呢位善長就係做大生意之人，在東南亞與內地都吃得開，佢唔問左丁山買邊隻馬，只問股市前景如何。講呢啲嘢經常會講錯，經常發生之事就係你唱好之時，股市會跌，你唱淡咩，股市就狂升，不過經驗告訴我們，做好友較受歡迎，做淡友會乞人憎，衡量之下，聽內地專家講「滬綜指5000點不是夢」，又云：「信任黨的智慧和力量」，當然係唱好啦，左丁山對富翁講：「股市仍然睇好，國策力撐股市，A股港股未升完。」
話係咁話，但升邊隻股票就好難確定，富翁拿出手機，㩒完一隻H股又一隻H股，俾走勢圖左丁山睇，隻隻走勢都差不多，就係在4月8日後以90度角向上升，升幅之快，之大，資深股票分析師一定唔信。富翁話：「呢呢，內地朋友打電話落嚟叫我代買呢十隻八隻股票，隻隻都升咗幾十巴仙，真係神奇。我只係跟風買番少少，已經賺到笑，我都唔明白點解內地朋友啲眼光準得咁犀利。」
呢啲事唔明好過明，目前股市純由內地消息與資金流向主導，「莊家」在上海、深圳指揮，硬係消息快香港人一步，到香港散戶高追之時，人地已經派發收割矣。故此如果要參與「大時代」，相信「黨的智慧和力量」嘅話，比較好嘅方法還是買A50，恒生H股ETF呢類（2822、2823、2828），聽消息買入個別細價股如1480，隨時輸死。今勻港股由四月一日開始上升，四月八日急升960點，令好多人措手不及，基金唯有急急入市追貨，以免跑輸大市，於是二十日之內，去到四月二十八日，恒指升上28442，二十日升咗3360點，約13.4%，之後投資者回復冷靜，亦被內地股市升跌牽着鼻子走，反覆回落到五月二十九日之27424點，成個五月埋單跌咗709點（2.5%），但如果A股真的衝破5000點，港股又會癲過。現今股市好難玩，基本分析完全冇用，唯有隨波逐流，小注怡情。