林建岳除咗係「娛樂大亨」，仲係「飲食大亨」，出名識飲識食，開設多間中西日餐廳，8 1/2 Otto e Mezzo Bombana就係其中一間，負責呢間餐廳嘅名廚Umberto Bombana跟岳少相識22年，形容岳少十分鍾意食物與餐廳，「只要餐廳多人幫襯，又讚食物美味，佢（岳少）就好高興」。
Bombana與岳少因中環麗嘉酒店（現已重建為中國建設銀行大廈）而結緣。林氏家族旗下麗新發展（488）當年投資麗嘉酒店，Bombana喺1993年獲邀請來港，喺麗嘉開設高級餐廳Toscana。Bombana話，來港前唔認識岳少，岳少經常幫襯Toscana，大家先至認識。
直至2008年麗嘉拆卸重建、Toscana結業，岳少就搵佢合作開設8 1/2 Otto e Mezzo Bombana。Bombana透露，岳少完全放手畀佢打理餐廳，冇特別要求，兩人亦從未有過爭拗，合作至今十分順利，亦算成功，大家都樂在其中。
好奇問到岳少最鍾意食乜東東，Bombana苦思良久都想不出來，事關岳少乜都鍾意食！其實睇岳少身形都估得到。