政改方案到底過唔過到，全香港人都肯定好關心，但有位政界口痕友就話，肯肯定有一人對呢件事嘅關心度，遠超任何一個人，甚至中央政府喎。嘩，邊個咁關注香港政改發展？嗱，花生友有此一問後，即刻被口痕友糾正，「邊個話係因為關心香港？唔可以關心自己發展㗎？」哦，原來佢係講緊新民黨主席葉劉淑儀。
呢位口痕友因乜解究要鑽研葉劉？佢話因為葉劉選特首之心真係昭然若揭，包括近期接受某傳媒訪問時，酸溜溜咁話，參唔參選要進行客觀評估，至少要計過票、睇吓自己有冇機會，仲有意無意暗示，如果有意爭冧莊嘅特首梁振英已經箍咗財團票，咁就由CY玩飽佢云云，反映佢好緊張「勁敵」喺邊啲界別搶佢票。
憂葉劉為民意任意妄為
花生友都就此問過工商界中人，唔少人都話，如果要喺CY同葉劉之中二揀一，佢哋寧願揀CY。乜財團唔係唔like CY㗎咩？此工商界中人話係就係嘅，但𠵱家CY上場已3年，有往績估到佢會做啲乜，掉番轉佢當選後亦唔敢向工商界做啲乜，大家客客氣氣咪算。而葉劉相對CY而言，似乎更加會為民意而「任意妄為」，而且葉劉嗰種霸氣，工商界都未必抵得住，比較之下似乎CY仲易搞喎。
花生友