【科技籽：GG鬥室】
近期「屎袋」一詞於黃金及高登場內極速竄紅！一次美麗的誤會，讓尿袋升格至屎袋的層次，今日找來場內三位專賣屎袋的sales，發掘它們不為人知的副業。如果「屎坑咁大嘅容量」，配上求生燈及外置硬碟、還可作過江龍之用……真係好似漆黑中嘅螢火蟲一樣，咁鮮明，咁出眾！
走入屎袋的出處——展昇有限公司，負責尿袋貨架的店員Staiman馬上「耍冧」：「其實係我打錯字！原本只係無心之失，不過俾《100毛》推上網，好彩公關同事完美咁解決件事。咁啱佢嘅容量高達30,000mAh，於是順勢話佢有屎坑咁大容量。另外，我哋仲喺facebook同客戶道歉，只要畀一個like，呢部屎袋就會由$258減到$198。」
不說不知，主角PRODA Power Box原本可是蟹貨，上架近一個月，依然乏人問津。在事件發生後，大家才驚覺它的超高容量，「30,000mAh喺場內數一數二，就算面對3,000mAh高容量嘅手機，扣除電壓升頻同轉換嘅兩成電力，大約可以叉到八次，所以好多中港兩邊走嘅客人都鍾意用佢；不過飛機客就要留意喇，容量過大嘅屎袋，係唔可上機㗎。」
結合外置硬碟 Apple認證
場內另一「高容量」代表是MAZZO Power Drive，雖然只有3,000mAh，大概勉強可為iPhone 6叉一次電，但它身懷特殊功能，「屎袋加外置硬碟，現在係場內唯一、亦係全世界首部。以USB連上手機，除咗可以供電，仲提供16GB（$399）或32GB（$499）外置儲存空間，而且得到Apple認證。呢點非常重要，如果早年有買山寨Apple手指U盤嘅人，可能會發現iOS升級後，U盤就唔用得，認證嘅一部份就係要內置升級chipset。」PIPO店員Cyrus如是說。而且Apple的手指U盤一向較貴，原本四、五百元只能買到同等容量的U盤，現在多送叉電功能，可以一試。
跟機鱷魚鉗 增壓後點火
屎袋只可用來叉手機？想法太膚淺喇，其實大如汽車都叉得起！所說的是容量為6,000mAh的JumpsPower AMG6，A-Grade的高級店員Lewis說：「除咗用micro USB輸出畀手機，只要用跟機配置嘅「鱷魚鉗」專用線，仲可以喺你架車冇電嗰陣，急速增壓至12V，幫你架汽車點火。雖知一般搵的士做過江龍服務，車費連搭着費，閒閒哋都百幾二百，最大問題係遇着交更時間，好少人會睬你。呢個屎袋有齊電筒功能，又送點煙器車叉，放一部喺車可以話有備無患。」
展昇Staiman TIPS：
「好多尿袋有『甩咳保險』，當你反轉micro USB或插錯位嗰時，導致正負極互撞，屎袋就會進入停用模式。好多人以為壞機，其實只要為尿袋重新充電，就會恢復正常。」
PIPO Cyrus TIPS：
「其實到今日，仲有好多人鍾意用電腦USB頭為尿袋叉電，其實呢類USB電流只有0.3A至0.5A，假如你用5,000mAh嘅屎袋，可能叉足一個星期都唔滿！」
A-Grade Lewis TIPS：
「用緊嗰陣，屎袋一定會微暖，所謂嘅過熱，一般係指五十度或以上。如果想測試屎袋熱度，建議摸吓機身USB，如果熱到一摸即縮，就要馬上停用，同埋搵代理檢查。」
神秘Crossover功能
1W超光救命燈
地球好危險，所以屎袋連求生燈功能都包埋。除了白光LED，還有紅光1W LED閃動模式，據知吸引很多童軍及行山人士使用，還把它當作電筒及營燈等。容量為5,200mAh，說明書稱可連續發亮十二小時。
太陽能得個樣
屎袋加太陽能板，還要是10,000mAh，店員都說，或者曝曬一個星期，會有一至兩成電。所以絕對是噱頭，國產貨就是會帶來歡樂。
熱賣紙箱人
紙箱人屎袋經常有新版本推出，今次6,000mAh版最與別不同，做成極有厚度的紙箱形，相對之前的一大塊設計，的確可愛得多。而且雙眼在使用時會着燈，尺寸也和figure相若，好有情景feel。
聯乘化妝燈
具枱燈功能，更可以調校角度，容量為5,200mAh，約可使用十小時，據稱不少化妝師十分喜歡，因上門化妝時有補光作用，又可作屎袋叉電。
喪抄自拍神器
大家不會陌生，機形取材自自拍神器，除6,800mAh容量，機身還配備藍牙快門，方便大家用手機自拍。
（a）展昇 深水埗黃金商場地面42至44號鋪
（b）訊達科技 深水埗黃金電腦商場地庫63/67號舖
（c）A-Grade 深水埗欽州街94號黃金中心地舖4-7
記者：朱崇德
攝影：許先煜
編輯：陳國棟
美術：房 雍