【鳩嗚乜乜乜】
越嚟越多人鍾意賞花，費清同識花人、香港高等科技教育學院（THEi）特任導師張浩傾開，佢話其實呢兩個月天氣轉熱，雨水開始增多，可以欣賞嘅花仲多。
#香港大沙葉似煙花
喺市區街道、公園，可以發現正值花期嘅藍花楹、山茶花、水石榕、荷花玉蘭、白蘭、黃蘭、樟樹、串錢柳、鳳凰木等等，可以話係有豐富色彩，又有唔同嘅香味。
喺郊野公園或行山徑，仲有好多本土植物，比如銀柴、土沉香、假鷹爪、鐵冬青、金銀花、野牡丹、桃金娘、香港大沙葉、木荷等等。
張導師特別向大家推薦香港大沙葉，呢種少有用「香港」嚟命名嘅植物，喺香港首次發現，喺1934年曾經作為新物種發表。
大家可以喺香港好多地方，比如盧吉道、夏力道搵到。除咗白色嘅花瓣，細長花冠筒、好似球形嘅聚傘狀花序之外，葉表面黑色星點狀嘅固氮菌，都係一個重要識別特徵。
每年3至8月，「盛放嘅香港大沙葉，遠遠望去，花朵就好似滿樹繁星，又似煙花，絕對值得去好好欣賞一番」。
張導師講得咁肉緊，真係搞到費清都想即刻去睇吓。
＃要生計，也要生活 ＃毋忘初衷
費清