同車淵源甚深嘅木偶哥林師傑，一次又一次因為車車車車而車出人氣，最令人印象深刻嗰單當然係俾時任女友鄧穎芝踢爆車震偷食事件，去年11月又被網民拍咗條片，話木偶哥疑超速違例。
最新嗰單，咪就係做完《愛‧回家》炒車，喺西貢清水灣大埔仔村，同一輛客貨車及專線小巴相撞，跑車車頭撞至凹陷，當時有一名少女陪伴在側，最後揭發原來嗰名「少女」就係歐陽巧瑩，林師傑亦承認兩人戀人關係，仲話已經帶女友見埋家長。
花心媾女王形象根深蒂固，舊愛鄧穎芝又不時寫幾句「夭潤」下木偶哥，搞到木偶哥好頭痕，不時於網上發表類似「我習慣任何人都可以將我看成罪人，所有責任歸我，功德歸人」灰爆言論。但今日凌晨，木偶哥終於忍唔住，講多啲。
木偶哥話:「唉～多謝所有問候過我嘅人，人冇事，放心，有心喇～我以後會小心啲渣(揸)車㗎喇！唉，下下好事不出門，壞事傳千里。
「我明明係嗰朝嘅第3單意外，我未發生意外前都係塞緊車返工㗎⋯偏偏又要寫到好似我一個人另(令)到交通癱瘓⋯唉，究竟要努力多幾多倍，做多幾多嘢，我啲歌，我啲角色，先可以好似我啲負文(聞)滲透力咁深⋯其實有幾多人知我出咗新歌？（唉，繼續努力啦⋯講⋯）」
唔止0架，林師傑又回應番去年11月嗰單疑似超速駕駛，佢話:「唉⋯1.早前係網民超速行駛時拍到我在路上行駛，作出挑釁，我係冇理會佢㗎，片入面都好清楚；2.昨天(木偶哥是指28日)，我是在同一路段，第三宗交通意外。我發生意外前，亦係塞車嘅受害者之一。不過，為大家增添咗不便，唔好意思。人冇事，亦係度多謝所有關心我嘅人。下下要解釋都唔係辦法⋯」