「嘩，升800%！」、「吓，又跌三成？」、「A股化喇，A股化喇……」A股化已成為股民新口頭禪，但何謂A股化？若用一句話概括，就係有今生，冇來世。和內地人接觸得多的話應有同感，有相當部份人賭性極強，好似今日唔去到盡，聽日就會被時代淘汰。究其原因，係中國人睇唔到未來。
中國六四後實際上行一套上壓右疏政策，政治上一切打壓，但人需要宣洩渠道，所以要右疏，即引導全國上下所有精力都只為搵錢。久而久之，舉國上下嘅核心價值觀只剩錢同權力。遇到問題，凡事以權錢了斷，冇的話你注定坎坷，於是冇人唔相信街邊跌到嘅阿婆唔係為敲詐，上到法庭法官會問：「唔係你撞到佢，你點解要幫佢？」稍為有錢的人都將身家財產老婆仔女送出國，如同非洲草原動物大遷。國人人心之躁動，乃三千年之所未見。
社會上所有不公，經濟上行時會沖淡，有人會為咗錢而忍，但當經濟下行時，積壓嘅矛盾就容易激發。現時中國領導層明顯洞悉到問題所在，所以先有「中國夢」嘅提出。夢，就係賣將來。呢個夢並唔單止係賣畀國人，亦賣畀外人，向所有國家展示經濟唔好唔使驚，有錢入嚟齊齊搵。
美匯92至95左右係短底，盤底後將會再次殺上，從技術走勢而言最少見120；日圓第三浪貶值亦即將開始，兌美元相信會見130甚至140以上。美元萬劍歸宗係一度扯力，日圓貶值則係包抄，熱錢有撤離中國之虞，同時出口更加難做。當資金大逆轉嘅時候要睇兩條數，一為資本賬，另一為經常賬，前者即金融，後者即貿易。兩條數只要其一為正，都仲頂得住。但若然兩條數都負，情況將會嚴峻。國企合併係安內，築夢係安心，下一步，就係突圍。
Mr. Tregunter