踏入五月份之後，每次賽事都例有隔一周或以內匆出馬匹交出佳績，好似上次日賽及剛周三上名之「馬來之珍」和「喜多屋」，便是最好例子。今期(31日)沙田賽事，有三駒剛於上次日馬跑完，分別為「活力歡騰」、「好心思」及「金龍華」，後兩駒更加係有開表現，趁勇再來必定有計。
第四場「金龍華」返回四班後近三戰均入位，證明評分已找到支持點，上完名咁快又跑，以賢廐馬而言是好事，翻查今季共有五匹賢廐馬，上名後隔一周又再跑，交出兩勝兩位佳績，好似最近就有「創基寶」匆出贏馬補中，「金龍華」出埋王牌更顯戰意，有力取得在港首捷。
至於第十場「好心思」剛於上次日賽爆冷贏馬，睇番今季共有14駒贏完，相隔唔夠10日再上陣，當中12駒繼續上名，共獲四冠五亞三季，證明練馬師肯安排贏開嘅馬匆出，必定係想打鐵趁熱乘勝追擊；加上姚廐今季有「樂在其中」隔一周匆出連捷，「好心思」大可依樣畫葫蘆。