舒拉寶娃早喺17歲已經首次拎到溫網冠軍，以球技兼美貌成為國際網球壇焦點，不經不覺已經過咗11年，舒娃美艷如昔，雖然唔可能再叫美少女，但佢就寄語新一代「娘娘」、加拿大嘅寶查，要應付外間壓力先可以成功。
幾鋒利嘅刀都有生銹嘅一日，舒娃都已經28歲，幾靚女都好，男球迷都有睇到慣嘅一日，加上佢同男友狄美托夫高調拍拖，更加傷一眾宅男嘅心。長江後浪推前浪，21歲嘅加拿大新星寶查堪稱新一代網壇美少女，上年溫網殺入決賽一鳴驚人，最難得就係佢好識利用社交網站威力，不時上載靚相、性感相「派糧」，迷得眾兵暈陀陀。
「網球永遠係追求目標」
不過顧得扮靚，就顧唔到表現，寶查今年成績下滑，更喺今屆法網首圈出局，「老娘娘」舒娃見到佢咁，就忍唔住教番佢幾招。舒娃喺上周五擊敗澳洲球手史杜莎後就話：「當你突然間成名，係需要一段時間適應，我之前都經歷過呢段日子，真係相當難捱；成名代價就係獲得好多機會，可以參加不同嘅社交場合，同明星見面，又可以拍時尚雜誌封面，雖然我樂在其中，但其實花咗唔少精力，如果你唔繼續喺比賽有好表現，呢啲機會就會流失。所以要認清目標，網球永遠係我追求嘅目標。」雖然舒娃年紀有番咁上下，不過唔代表佢唔爭艷鬥麗，今屆比賽都預備件水手裝吸睛，不過舒娃就預告，周日對莎花露娃嘅第四圈比賽，都唔會着水手裝。
另外，上周六嘅比賽戰果都好正路，男單一哥迪祖高域，以3:0輕取澳洲嘅高基拿基斯，晉身男單第三圈，至於三號種籽英國球手梅禮亦都輕鬆以3:0淘汰另一位澳洲球手基治奧斯。
文：牽牛
