有功勞，又有苦勞，話晒係幾朝元老，啱啱幫紐卡素護級成功嘅阿根廷硬漢約拿斯古迪利斯，日前慘被球隊拋棄！古迪利斯喺網上痛斥班主艾殊利不近人情，獲得好多網民支持。
古迪利斯由2008年開始就效力紐記，忠心耿耿，近年受睪丸癌折磨，好唔容易先贏到癌魔，今年正式健康復出，喺季尾成為紐記護級成功嘅主力。仲記得最後嗰場對韋斯咸，紐記要贏波先穩陣留級，就係靠古迪利斯先交助攻，再入一球，幫紐記贏2:0，真係護級大功臣！
其實，古迪利斯病又病好咗，球場上表現唔錯，加埋佢嘅抗癌故事非常勵志，深得「喜鵲」球迷支持，如果我求大俠係班主艾殊利，真係錫晒佢，即刻同佢續約㖭啦。不過，艾殊利諗嘢就係好唔同，逢球迷覺得好嘅，佢就話唔好，紐記宣佈唔會同古迪利斯續約，放佢自由身離隊。
twitter寸爆班主艾殊利
喺紐記踢咗咁多年，最後得到咁嘅待遇，古迪利斯唔捨得之餘，仲好鬼嬲，所以喺twitter度鬧爆艾殊利：「呢個病令我明白到兩件事：紐卡素嘅球迷係點咁支持我，同埋班主係點樣唔理我。」佢出咗個post半日左右，就超過萬五個球迷like咗，仲有兩萬幾次嘅轉發。留言嘅球迷都好支持古迪利斯，話好尊重佢，祝佢好運，亦有人話紐記呢啲球隊同班主根本唔值得古迪利斯留低，佢值得去一啲更好嘅球會。
我求大俠都唔擔心古迪利斯冇班落，睇過佢踢波都知，佢踢法搏命兼勤力，中場掃蕩力極強，攻守皆宜，翼鋒、防中甚至兩閘都踢得。佢英超經驗豐富，又擅踢多個位置，相信大把球會爭，同埋都係31歲，應該仲有兩三年高峯。除咗古迪利斯之外，紐記後衞賴恩泰萊都不獲續約，會喺今夏自由身走人。記得賴恩泰萊係踢閘位，罰球唔錯㗎，但就冇咩運氣，近年兩度嚴重受傷，希望佢快啲搵到新東家啦。
識睇，一定係睇足英台【英波Live】：
http://soccer.appledaily.com
http://bit.ly/engballlive