進入六月，球賽開始打完，係時候出街運動吓喇肥仔肥妹，天文台話今年會比平常更熱，玩街跑、踢波、打籃球或踩單車真係隨時會中暑虛脫，所以大部份人都會去海灘泳池游水。奄尖友問，有冇咩特別啲？我答，你有冇錢先？有就易話為，輕則可以滑水，好似一班明星咁定時入去大潭，租架快艇再搵教練操吓花式，十幾年嚟相信好多人都玩過，𠵱家快艇打爆一缸油唔算平，但要喺船P中眾多比堅尼女仔面前扮有型自然要付出少少代價。
如果你想再囂張啲，當然可以玩水上電單車，但首先，你要有或者識朋友有遊艇，冇？你可以去泰國搞掂。而注目度最高者，一定係Flyboard（圖），台灣叫「水上鋼鐵人」，即係Ironman，如果你有睇電影《喜愛夜蒲》，有幕去船河，好多人噴射式喺水面飛嚟飛去嗰隻就係。香港有一批潮人已經玩緊，學一堂都過千銀，你要玩到有成績一定過萬銀。都係嗰句，用呢個價錢去做潮人，抵過你玩 Jordan。你上網搜查「香港Flyboard」慢慢睇啦，其實去台灣玩價錢仲平，自己格吓價。
如果你仲想儲錢置業，連戲都唔捨得睇，咁你可以去滑浪。最方便係去大浪灣，搵間士多租塊板，玩足一日都係所費無幾，仲可以識到好多朋友，飲吓啤酒，學睇風睇浪，如果平日去仲有好多model入去影相，包你唔會悶，今個夏天，入面見。
梁栢堅
填詞人+彩池人