護級成功嘅阿士東維拉，下半季踢法滿有自信，料今晚不會縮後坐以待斃，阿仙奴（圖）主攻踢法佔優。呢場足總盃決賽估計法定時間90分鐘內完成，重心先博入球「大」。
英足盃決賽近年非常緊湊，自06/07年球季返回溫布萊球場後，無論係強撼強車仔對曼聯，或上屆阿仙奴鬥侯城，高低分別唔明顯；總計七屆有五屆係90分鐘內一球分勝負，另外兩屆如剛提及嘅決賽，要戰至加時才能分出勝負。阿仙奴近屆喺溫布萊亮相成大熱一方，每令捧場客損手，10/11年英聯盃決賽負伯明翰、上屆足總盃決賽法定時間逼和侯城，同今屆四強靠加時先反勝英冠中游分子雷丁，廠迷猶有餘悸。
維拉自從二月中有熱血領隊舒活登場後，脫胎換骨，一改季初前波士林拔帶領下，首25場聯賽僅入12球嘅英超史上劣績。當然舒活行運醫生醫病尾，多得王牌前鋒賓迪基腳踭傷患全好，季尾入球唔停；但其4-3-3陣式中的三位土炮中場，湯卡華利、艾殊利韋斯活特同輸血管戴爾夫，助攻助守，威力強時如準決賽90分鐘掃低踢三後衞陣式嘅利記，無懼任何強敵；但前仗喺護級戰，上半場已落後主場修咸頓1:5下大敗而回，防線露底了。
阿仙奴近年最怕就係對手縮窄防線，既然估計心雄、又成功護級嘅維拉唔縮，戰情會利季尾有韋舒亞同禾確特加入爭正選嘅阿仙奴，打快速陣地戰。正箭頭基奧特冇咗韋碧克幫手拉開對手防線後，近八戰未有波入；睇到禾仔回勇，加埋另一側擊力強嘅張伯倫上仗已能後備復出，勢添阿仙奴進攻新動力。基奧特面對今季失誤甚多嘅維拉中堅華亞爾，有望打破入球荒之餘；對手賓迪基頭槌亦了得，阿仙奴守將亦不易抵擋，故今場策略博近五戰對碰俱開到的入球「大」作重心，再敲阿仙奴大勝波膽。
另外，目前喺日職榜首放領嘅浦和紅鑽，開季以來戰績突出，打起兩土炮武藤雄樹同關根貴大，今作客鳥棲砂岩，可破對手今季主場不敗身，向首階段冠軍挺進。另一場，當博大阪飛腳，剛晉身亞冠盃八強，乘勇作客橫濱水手；查前者今季戰畢亞洲賽後，返國內賽事取得五勝一和未敗，平手盤可取。
波神
神級攻略 智破足彩